स्वामी शामानंद एज्युकेशन सोसायटी, घाटकोपर

स्थापना १९८७ 

संस्थेविषयी (About Society)

ज्ञान दिल्याने ज्ञान वाढते” या पवित्र विचारातून उभे राहिलेले हे ज्ञानमंदिर म्हणजे स्वामी रामानंद एज्युकेशन सोसायटी होय. अध्यात्म आणि शिक्षण यांचा सुंदर संगम साधत समाजातील वंचित व होतकरू विद्यार्थ्यांसाठी शैक्षणिक कार्य करण्याचा पवित्र संकल्प या संस्थेने केला आहे.

सन १९८६ साली पुण्यात्मा सद्गुरु स्वामी रामानंद यांनी भटवाडी, घाटकोपर (पश्चिम) येथे असलेल्या स्वतःच्या जागेवर समाजासाठी शैक्षणिक कार्य व्हावे अशी इच्छा व्यक्त केली. शिक्षण महर्षी माननीय श्री. राऊत सर यांनी या संकल्पनेला मूर्त स्वरूप दिले. गुरु आज्ञा प्रमाण मानून सन १९८७ साली स्वामी रामानंद एज्युकेशन सोसायटीची स्थापना करण्यात आली आणि स्वामी शामानंद हायस्कूल या शैक्षणिक रोपाची भटवाडी परिसरात लागवड झाली. आज हे रोप वटवृक्षात रूपांतरित झाले असून शिशुवर्ग ते बारावीपर्यंत सुमारे १२०० विद्यार्थी शिक्षण घेत आहेत.

संस्थेचे आधारस्तंभ शिक्षण महर्षी माननीय श्री. राऊत सर आणि मुख्य कार्यकारी अधिकारी कै. श्रीम. विद्या राऊत मॅडम यांच्या नेतृत्वाखाली मागील ३८ वर्षांपासून संस्थेचे शैक्षणिक कार्य अविरत सुरू आहे. स्वामींनी शैक्षणिक कार्यासाठी दिलेल्या जागेवर संपूर्ण शाळा उभी राहावी हा संस्थेचा ध्यास असून श्रद्धा, जिद्द आणि समाजसेवेच्या भावनेतून संस्था सातत्याने प्रगती करत आहे.

शिक्षणापासून वंचित राहणाऱ्या विद्यार्थ्यांना शिक्षणाच्या प्रवाहात आणण्यासाठी सन १९९३ साली स्वामी रामानंद नाईट हायस्कूल आणि सन २००० साली स्वामी रामानंद नाईट ज्युनिअर कॉलेजची स्थापना करण्यात आली. पूर्व प्राथमिक, प्राथमिक, माध्यमिक, उच्च माध्यमिक (वाणिज्य) आणि रात्रशाळा अशा विविध स्तरांवर संस्था शैक्षणिक सेवा देत आहे.

विद्यार्थ्यांच्या सर्वांगीण विकासासाठी ज्ञानरचनावादी अध्यापन, शिष्यवृत्ती मार्गदर्शन, इंग्रजी संभाषण उपक्रम, टिळक विद्यापीठ परीक्षा, प्रज्ञाशोध परीक्षा, डिजिटल वर्ग, ई-लर्निंग, कृतीयुक्त शिक्षण अशा अनेक अभिनव उपक्रमांची अंमलबजावणी करण्यात येत आहे. याच परिश्रमांचे फलित म्हणजे शाळेचा एस.एस.सी. निकाल सातत्याने ९९% आणि बारावीचा निकाल ७५% पेक्षा अधिक लागतो. रात्रशाळेचा निकाल देखील उल्लेखनीय आहे.

या संस्थेतून घडलेले अनेक विद्यार्थी डॉक्टर, इंजिनियर, कलाकार, क्रीडापटू, प्रशासकीय अधिकारी आणि विविध क्षेत्रांमध्ये यशस्वी झाले आहेत. विद्यार्थी संघटनेमार्फत वृद्धाश्रम भेट, आरोग्य शिबिर, डिजिटल वर्ग, क्रीडा प्रशिक्षण, सामाजिक उपक्रम राबवून संस्थेला सतत योगदान दिले जाते. “गौरव महाराष्ट्राचा” या विद्यार्थी निर्मित कार्यक्रमातून संस्थेच्या विकासासाठी निधी उपलब्ध करून दिला जातो.

एन.सी.सी. कॅडेट परेड, गिनीज वर्ल्ड रेकॉर्ड, कबड्डी, तायक्वांदो आणि विविध क्रीडा व सांस्कृतिक क्षेत्रात संस्थेच्या विद्यार्थ्यांनी उल्लेखनीय कामगिरी केली आहे. तसेच विविध सामाजिक संस्था व शैक्षणिक फाऊंडेशन यांच्या सहकार्याने संस्थेची शैक्षणिक घोडदौड यशस्वीपणे सुरू आहे.

माननीय श्री. राऊत सर यांचे खंबीर नेतृत्व, विश्वस्त डॉ. विनय राऊत यांचे मार्गदर्शन, संस्था प्रतिनिधी माधवी नांदेडकर मॅडम यांची प्रेरणा, मुख्याध्यापक व शिक्षकांचे परिश्रम आणि पालकांचे सहकार्य यामुळे ज्ञानाचा हा दीप सतत प्रज्वलित राहिला आहे आणि पुढेही समाजासाठी कार्यरत राहील.

ब्रीद वाक्य

प्रज्वलितो ज्ञानमयोदीपः

दूरदृष्टी

सर्वांगीण गुणवत्तापूर्ण शिक्षण, अभिनव कल्पना आणि तंत्रज्ञानाच्या माध्यमातून विद्यार्थ्यांना घडवणे, शिक्षकांना सक्षम करणे, आणि विद्यार्थ्यांना समाजासाठी योगदान देण्यासाठी व जागतिक पर्यावरणाची काळजी घेण्यासाठी प्रेरित करणे, असे परिवर्तनशील शिक्षण केंद्र बनणे.

जीवितकार्य

संपूर्ण, अभिनव आणि समावेशक शिक्षण प्रदान करणे जे विद्यार्थ्यांना उत्कृष्टता साधण्यास आणि समाज व राष्ट्रासाठी सकारात्मक योगदान देण्यास सक्षम करते.

उद्दिष्टे

• विद्यार्थ्यांमध्ये सुनिश्चित मापदंडांच्या आधारे शैक्षणिक उत्कृष्टता, भावनिक समज आणि नैतिक मूल्ये जोपासणे.
• विशेषतः विद्यार्थिनींना अग्रक्रम देऊन सर्व विद्यार्थ्यांसाठी समान संधी आणि पोषक वातावरण निर्माण करणे.
• आंतर विद्याशाखीय शिक्षणाद्वारे नावीन्य आणि सर्जनशील अभिव्यक्तीला प्रोत्साहन देणे.
• खेळ, कला आणि मानसिक स्वास्थ्यासाठी उपक्रमांद्वारे शारीरिक व मानसिक आरोग्यास प्राधान्य देणे.

ध्येय

• वंचित समाजघटक आणि काम करणाऱ्या विद्यार्थ्यांना शिक्षण प्रदान करून त्यांना चांगल्या भविष्यासाठी सक्षम बनवून सामाजिक बदल घडवणे.
• कौशल्याधारित शिक्षण, व्यावसायिक प्रशिक्षण आणि उद्योगातील प्रवाहांचा परिचय करून देऊन विद्यार्थ्यांना भविष्यातील करिअरसाठी तयार करणे.
• गुणवंत गरजू विद्यार्थ्यांना आर्थिक मदतीची सोय करणे.
• शिक्षणासोबत कला, क्रीडा आणि सहशालेय उपक्रम समाकलित करून सर्वांगीण व्यक्तिमत्त्व तयार करणे.
• संशोधन संस्कृतीला प्रोत्साहन देणे आणि विद्यार्थ्यांना ज्ञाननिर्मिती आणि समस्यांचे निराकरण करण्यासाठी प्रेरित करणे.
• स्थानिक समुदायांशी संवाद साधून आणि शैक्षणिक आणि सामाजिक विकासासाठी कार्यक्रम राबवून सहभाग वाढवणे.
• विद्यार्थ्यांना एकमेकांशी सौहार्दाने जोडलेल्या जगात टिकून राहण्यासाठी जागतिक जागृती आणि सांस्कृतिक सामंजस्य निर्माण करणे.